म्युच्युअल फंडात गुंतवणूक  करताना कोणत्या गोष्टी ध्यानात घेणे गरजेचे आहे, हे जाणून घेणे महत्त्वाचे ठरते.

सुरुवातीची प्रक्रिया

इच्छुक गुंतवणूकदाराला केवायसीचा अर्ज भरून देणे आवश्यक असते. या अर्जासोबत एक छायाचित्र, पॅन कार्डची प्रत, निवासाचा व नागरिकत्वाच्या दाखल्याचा पुरावा, बँक खात्याच्या नोंदी द्याव्या लागतात. याशिवाय गुंतवणुकीसंबंधी अर्जही (फर्स्ट इन्व्हेस्टमेंट फॉर्म) निबंधक अथवा फंड हाऊसकडे जमा करणे अनिवार्य असते. काही फंड हाऊस ई सेवाही स्वीकारतात. या माध्यमातूम तुम्ही झटपट गुंतवणूक करू शकता.

 योजनेची निवड

म्युच्युअल फंडात प्रथमच गुंतवणूक करताना गुंतवणूकदाराने आपले वय, उद्दिष्ट, जोखीम पत्करणाची क्षमता, किती काळासाठी गुंतवणूक करायची आहे या मुद्द्यांचा विचार करणे आवश्यक ठरते. आपले उद्दिष्ट गाठण्यासाठी किती गुंतवणूक करावी लागेल याचे मार्गदर्शन काही वेबसाइटसवर विनामूल्य उपलब्ध आहे. त्यांच्या कॅलक्युलेटरचा वापर करून हे उद्दिष्ट ठरवता येते. याशिवाय यासाठी आर्थिक सल्लागाराचीही मदत घेता येते. गुंतवणुकीच्या विविध कालावधीसाठी विविध प्रकारची गुंतवणूक करणे योग्य ठरते. तीन वर्षांपेक्षा कमी कालावधीसाठी गुंतवणूक करायची असल्यास डेट किंवा आर्बिट्रेज फंड योग्य ठरतात. तीन ते पाच वर्षांच्या कालावधीसाठी हायब्रिड फंड (या फंडात डेट व इक्विटीचा समावेश असतो) आणि पाच ते सात वर्षांच्या कालावधीसाठी इक्विटी म्युच्युअल फंडासारखे अधिक जोखमीचे फंड निवडणे योग्य ठरते.

फंड हाऊस

यासाठी आर्थिक सल्लागारांची मदत अनिवार्य ठरते. कोणता फंड निवडावा याचा सल्ला ही मंडळी देतात. गुंतवणूक करण्यापूर्वी या योजनेची आजवरची कामगिरी, फंड हाऊसचा पूर्वेतिहास, त्यांच्या व्यवस्थापनाची कामगिरी तपासणे महत्त्वाचे असते. फंड मॅनेजरची आजवरची कामगिरीही तपासावी लागते.

म्युच्युअल फंडाच्या योजनेच्या पूर्वीच्या कामगिरीवर भविष्यातील कामगिरी वा परतावा अवलंबून नसतो हे ध्यानात घ्या. मात्र या योजनेची तीन, पाच व १० वर्षांपूर्वीची कामगिरी कशी होती, याचा आढावा जरूर घ्यावा. आर्थिक सल्लागार तसे सांगतातही. तीन, पाच व १० वर्षांच्या कालावधीत या योजनांनी किमान परतावा दिला आहे का हे तपासावे. या विविध टप्प्यांत संबंधित योजनेने चांगली कामगिरी केली असेल तर तिच्या फंड हाऊसबाबत निश्चिंत राहाण्यास हरकत नाही.

अभिप्राय द्या!

Close Menu