राष्ट्रीय शेअर बाजाराने (एनएसई) गुरुवारी दोन नवे निर्देशांक सुरू केले. एनएसईची इंडेक्स सर्व्हिसेस उपकंपनीमार्फत निफ्टी भारत bond निर्देशांक ही मालिका सुरू करण्यात आली. हे निर्देशांक सुरू करतानाच त्यांची मुदतपूर्ती निश्चित करण्यात आली आहे. अशा प्रकारे प्रथमच निर्देशांकाची मुदतपूर्ती आधी ठरवली गेली आहे.

भारत बाँड निर्देशांकांतर्गत एएए दर्जाच्या व सरकारी कंपन्यांतर्फे बाजारात आणण्यात येणाऱ्या बाँडचे व्यवहार करण्यात येणार आहेत. ‘निफ्टी भारत बाँड इंडेक्स एप्रिल २०२५’ आणि ‘निफ्टी भारत बाँड इंडेक्स एप्रिल २०३१’ या दोन निर्देशांक मालिका गुरुवारी सुरू करण्यात आल्या. यापूर्वी डिसेंबर २०१९ मध्ये एनएसईने भारत बाँड निर्देशांकाच्या दोन मालिका सुरू केल्या होत्या. एप्रिल २०२३ व एप्रिल २०३० अशी मुदतपूर्ती असलेले हे दोन्ही निर्देशांक त्यावेळी सुरू करण्यात आले होते.

भारत बाँड एक्स्चेंज ट्रेडेड फंडाचे (ईटीएफ) व्यवहार निफ्टी भारत बाँड निर्देसांक मालिकेद्वारे होतात. या बाँडना वैयक्तिक गुंतवणूकदारांकडून चांगली पसंती मिळत आहे. डिसेंबर २०१९मध्ये बाजारात आलेल्या पहिल्या दोन भारत बाँड ईटीएफमध्ये ५० हजारहून अधिक वैयक्तिक गुंतवणूकदारांनी गुंतवणूक केली असल्याचे समजते .

बाँड ईटीएफ निफ्टी भारत बाँड निर्देशांकामध्ये गुंतवणूक करतो. त्यामध्ये एक्झिम बँक, एचपीसीएल, हुडको, आयआरएफसी, नाबार्ड, एनएचएआय, एनएचपीसी, एनटीपीसी, पीएफसी, एनपीसीआयएल, पॉवर ग्रीड, आरईसी आणि सिडबीसह ट्रिपल ए रेटिंग असणाऱ्या सार्वजनिक क्षेत्रातील कंपन्यांचा समावेश आहे. गेल्या वर्षी डिसेंबरमध्ये भारत बाँड ईटीएफच्या पहिल्या टप्प्यात १२,४०० कोटी रुपयांहून अधिक रक्कम गोळा केली होती. केंद्र सरकारच्या भारत बाॅंड ईटीएफमधून यावेळी १४००० कोटींचा निधी उभारला जाण्याची शक्यता आहे. या योजनेत दोन गुंतवणूक मालिका आहेत. एकाची मुदत एप्रिल २०२५ आणि दुसऱ्या मालिकेची मुदत एप्रिल २०३१ पर्यंत आहे.

Leave a Reply